#Lespeak – 扭計骰你扭到幾多面出嚟？
扭計骰有好多面，扭下扭下就會扭出更多變化出嚟。我哋成日都好想公眾當我哋係普通人一樣咁看待。事實上，我哋好似反而係由踏出自己屋企開始，就首先變咗另一面出嚟俾人睇，甚至有部分嘅人係一訓醒就要轉mode去迎合屋企人嘅期望，而唔係真正做自己。
朕就好少少，喺屋企仲可以做自己。不過出咗街，一撞到鄰居李師奶。
李師奶問：「皇上，你有冇拍拖呀？我個仔仲未拍拖呀。不過成日匿喺屋企，佢都幾好仔嫁，但就成日掛住打機。介紹俾你識呀？」
朕：「冇拍拖呀，不過唔使喇（尷尬笑）」
明明朕係有女朋友，喺呢啲moment朕又真係唔想話俾呢啲三姑六婆聽。恐怕答咗有，之後嘅follow-up questions仲多。呢一面係朕今日第一次扭出嚟嘅一面。我都係返個工啫，唔好搞我啦。
返到公司，面對一班上哂年紀嘅同事。恐同就不再話下，守舊嘅思想例如女仔一定要斯文啲，女仔一定要快啲結婚，全部都出哂嚟。連公司另一個同朕差唔多年紀嘅男同事都係恐同，結果就係又要再扭多次個扭計骰囉。面對幾位好熟嘅同事，朕有時真係好想同佢哋講出自己嘅性取向。有好幾次都差啲講咗，但最後都係吞返。
同事A：「男同事B可能可以氹我哋大老細陳生呢？可能陳生鍾意HEHE呢？」
同事B：「你講咩呀，你講咩呀？我最憎同性戀呀！」
朕當時都只係陪笑。日子耐咗，聽到呢啲都冇乜反應，有時會一齊笑埋一份。唔知係冇反應定係已經習慣咗。同事之間都知朕有拍拖，有位「男朋友」，而朕都一路以「男朋友」嚟形容女友。有時會諗點解同事唔察覺我呢位「男朋友」行為咁女人。喺同事嘅世界裡，男人唔應該係咁。還是同事係知道，甚至喺街見到，只係唔撞破？
新年嘅話，又要見班笑面虎嘅親戚。每年大家都只係update下status，質問下人哋啲仔女拍拖未，結婚未，生仔未，完全唔係真係關心你。對住親戚，就連父皇都要一齊扭埋佢自己個扭計骰。
某親戚：「呀皇上佢拍拖未呀？差唔多結婚喇喎呢個歲數。」
父皇：「未呀，呢啲由得啲後生去搞啦，佢鍾意啦。我哋點理到咁多…。」
相信父皇咁答同我答啲鄰居嘅道理一樣：法蘭西皇帝。一日之內要變咁多個樣其實都咪話唔攰，個腦不停要分析：呢堆人係講得有拍拖，講咗又可唔可以come out埋。唔out得，咁係咪又要用「男朋友」嚟形容我女友呢？個腦成個tree diagram出哂嚟。
你哋由起身嗰下到臨訓前，個扭計骰扭咗幾多次先收手？定係你可以保持最初個面？
#出街其實個扭計骰都扭到爛咁濟
#啲人成日話香港社會開放咗
#表面開放唔代表真正開放
#最後一篇暫別大家喇
#後會有期
